“ქართველი ხალხი ისჯება მხოლოდ იმისთვის, რომ ის ამყარებს თავის სუვერენიტეტს”– ბექა ოდიშარია აშშ–ის გადაწყვეტილებაზე

დასანანია ამერიკის შეერთებული შტატების სახელმწიფო დეპარტამენტის ხელმძღვანელის განცხადება… ეს ყველაფერი ხმარდებოდა ქართველ ხალხს და ქართველი ხალხი ისჯება მხოლოდ იმისთვის, რომ ის ამყარებს თავის სუვერენიტეტს”– ასე ეხმიანება საპარლამენტო უმრავლესობის წევრი, დიასპორისა და კავკასიის საკითხთა კომიტეტის თავმჯდომარე, ბექა ოდიშარია  შეერთებული შტატების მიერ საქართველოს ხელისუფლებისთვის ფინანსური დახმარების შეჩერებას.

დეპუტატის შეფასებით, განცხადება იმის შესახებ, რომ საქართველოს მთავრობას რაიმეს უწყვეტენ, აცდენილია რეალობას, რადგან მთავრობას სახლში არაფერი მიჰქონდა.

„ეს ყველაფერი ხმარდებოდა ქართველ ხალხს და ქართველი ხალხი ისჯება მხოლოდ იმისთვის, რომ ის ამყარებს თავის სუვერენიტეტს. რაც შეეხება წამოძახებას დახმარებების და მათ შორის ექვსი მილიარდი ლარის შესახებ, დროა, ჩვენმა პარტნიორებმა ქართველი ხალხის ხასიათის შესახებ ინფორმაცია მიიღონ თავად ქართველი ხალხისგან და არა ლომჯარია-გიგაურისნაირი ადამიანებისაგან, რადგან ქართველ ხალხს ახასიათებს უკიდურესი მადლიერება, თუმცა დამადლებული არავისგან არაფერი უნდათ. შევახსენებდი საზოგადოებას, რომ მხოლოდ ბიძინა ივანიშვილს აქვს ამდენივე თანხა გაღებული უანგაროდ საქართველოსათვის და დღემდე ამ ადამიანს ერთხელაც არ უთქვამს ამის შესახებ“, – აღნიშნა ოდიშარიამ.

ამერიკის შეერთებული შტატები საქართველოს ხელისუფლებას 95 მილიონზე მეტი დოლარის დახმარებას უჩერებს. ამის შესახებ აშშ-ის სახელმწიფო მდივნის, ენტონი ბლინკენის განცხადებაშია საუბარი.