ცნობილია ახალგაზრდების ვინაობა, რომელსაც სვანეთში მეორედღეა ეძებენ.
დაკარგულები გოგიტა ფარჯიანი და გიორგი გვიჩიანი არიან. მათ სამძებრო სამუშაოებში ადგილობრვებიც ჩაერთვნენ.
როგორც მესტიის მკვიდრი, ვიკა ფილფანი გადაცემა “დღის სტუმარში” საუბრისას ამბობს, დაკარგული პირები არ არიან გამოუცდელი მთებში სასიარულოდ, თუმცა მათ ახლობლებს მიაწოდეს ინფორმაცია, რომ გზას აცდნენ მაშინ,როდესაც ზემო სვანეთიდან გადადიოდნენ ლასილის უღელტეხილით ქვემო სვანეთში, ლენტეხში.
მისივე თქმით, მიუხედავად იმისა, რომ კადრებში ნისლია, ტერიტორიის გარჩევა და ამოცნობა შესაძლებელია.
“კურიერი” დღეს ერთ-ერთი დაკარგული ახალგაზრდის ნათესავს დაუკავშირდა. ანა წერედიანი ამბობს, რომ დაკარგულებთან ბოლო სატელეფონო კონტაქტი 22 ივლისს შედგა, მას მერე კი მათთან დაკავშირება ვერ ხერხდება.
“22 ივლისს გამოვიდნენ კონტაქტზე. თქვეს, რომ გზა აებნათ, ამიტომ დააგვიანეს, უკვე გამოაგნეს გზას და მალე იქნებოდნენ, მაგრამ იმის მერე არ მოსულან. კონტაქტზე არ არიან, ერთი და მეორე მხრიდანაც აიარეს ადგილობრივებმა, მაგრამ კვალი არსად არ არის, არც სამაშველოა კვალზე გასული”, – განაცხადა ანა წერედიანმა.
სვანეთში ორი ახალგაზრდას დაკარგვის შესახებ 112-შიინფორმაცია 24 ივლისს შევიდა. დაკარგული ახალგაზრდების მოსაძებნად შესაბამისი ტექნიკის, კერძოდ კი სითბური დრონების ჩართვას ითხოვენ, რომელსაც ღამის ხედვის რეჟიმი აქვს, ასევე ვერტმფრენისაც, თუმცა სამაშველო ამბობს, რომ ამინდის გამო, ვერტმფრენის გამოყენება ჯერჯერობით ვერ ხერხდება.