„ქართული ოცნების“ ლიდერი მამუკა მდინარაძე დაორგანიზებულ მავნებლობას უწოდებს პრემიერ-მინისტრ კობახიძის გუშინდელი გამოსვლისას მოქალაქეების სტვენას:
„პატარ-პატარა ნეგატიური ამბები, როცა ძალიან ხშირად უპოზიტიურეს ამბებში ჩაეტენება ხოლმე ამას ცუდის მეტი არაფერი მოაქვს. როცა აორგანიზებენ რაღაცას, რომ ვიღაცამ პრემიერის გამოსვლის დროს დაიძახოს და 100 კაცი აყვეს, ეს არის ელემენტარული მავნებლობა. ერთადერთი საკითხი აღმოჩნდა, რომელზეც ერი გაერთიანდა, აქ როგორ უნდა ეძებო რაღაცის დადგმის შანსი,“ — ამბობს მდინარაძე.
გუშინ, 2 ივლისს საქართველოს ეროვნული ნაკრების საზეიმო დახვედრის ღონისძიება გაიმართა. თავისუფლების მოედანზე მოქალაქეები ნაკრების ფეხბურთელების სანახავად მივიდნენ. სპორტსმენების გამოსვლის შემდეგ, სცენაზე პრემიერ-მინისტრი ირაკლი კობახიძე ავიდა, რასაც შეკრებილთა ნაწილის მხრიდან სტვენა და შეძახილები მოჰყვა. კობახიძემ მიკროფონი პრეზიდენტ სალომე ზურაბიშვილს გადასცა, რა დროსაც სტვენა ტაშითა შეიცვალა.