საქართველოს ეროვნული ნაკრების კაპიტანმა, გურამ კაშიამ, ევროპოპის გადაცემა “ობიექტივში”, პროექტის “გასვლითი შეხვედრა” საკუთარ ბავშვობაზე ისაუბრა და თქვა, რომ დისლექსია ჰქონდა, რის გამოც ხშირად იყო ბულინგის მსხვერპლი.
- დისლექსია არის კითხვის უნარის დაქვეითება, რომელიც საკმაოდ ფართოდ არის გავრცელებული. სტატისტიკის თანახმად, მთელი მსოფლიოს მასშტაბით, ყოველი 10 ადამიანიდან 1-ი დისლექსიკია.
“დისლექცია თუ გაგუგია? აი მე დისლექტიკი ვარ. მთელი ბავშვობა ჩემი თავი შტერი, გაუნათლებელი მეგონა. ყველა მასწავლებელი მაგას მეუბნებოდა. ხმამაღლა კითხვა არ შემიძლია, ასოები მერევა. კვეკვესკირი სულ დამცინის ხოლმე, რაღაცას წავიკითხავ, მგონია, რომ ეს არის და ამ დროს რაღაც სხვა არის. მთელი ბავშვობა გავიზარდე იმ აზრით, რომ კითხვაში კარგი არ ვარ, მასწავლებელი რომ ამაყენებდა, წამაკითხებდა რაღაცას, ვერ ვკითხულობდი. მეუბნებოდა, “დაჯექი, შტერო, დებილო, გაუნათლებელო…. ამის გამო მთელი ბავშვობა მქონდა კომპლექსი. შემდეგ ჰოლანდიაში ინგლისურის სწავლა დავიწყე და იქ მასწავლებელმა მითხრა, წადი, დისლექსიაზე შეემოწმეო. საერთოდ არ ვიცოდი, რა იყო ეს სიტყვა. წავედი და ტესტები გავიარე. საქართველოში მოსახლეობის 14%-ს დისლექსია სჭირს. სპორტსმენი რომ არ ვყოფილიყავი, მთელი ცხოვრება არ მეცოდინებოდა, რომ დისლექტიკი ვარ“, – ამბობს გურამ კაშია ინტერვიუში, რომელიც 2022 წელს არის ჩაწერილი.
მან მისი კარიერის მძიმე პერიოდიც გაიხსენა. ეს იყო 2020 წელი, ისტორიული მატჩი საქართველოს და ჩრდილოეთ მაკედონიის ნაკრებებს შორის, რომელზეც ფეხბურთის ყველა ქომაგი დიდ იმედებს ამყარებდა, თუმცა ჩვენი ეროვნული ნაკრები მაშინ დამარცხდა, 0:1.
“ისე დავეცი მაგ თამაშის შემდეგ, აღარც ფეხბურთი მინდოდა არაფერი” – ამბობს კაშია.
გუშინ ცნობილი ხდება, რომ გურამ კაშია ბრატისლავის „სლოვანში“ კიდევ მინიმუმ ერთი წლით რჩება. “ევროპოპთან” ინტერვიუში კაშიამ ბრატისლავაში ცხოვრებაზეც ისაუბრა. კიდევ ერთი ქართველი, რომელიც ბრატისლავას გუნდში კაშიასთან ერთად თამაშობს, ჯაბა კანკავაა.
“2021 წლის ივნისში ჩამოვედი ბრატისლავაში. ძალიან შევეგუე აქაურობას. ევროპა ამიტომაა კარგი, რომ არ არის საცობები ისეთი, როგორც თბილისში. ზოგიერთ შენობას სიახლოვე აქვს ჩვენთან. საბჭოთა კავშირის კვალი იგრძნობა ზოგიერთ შენობაზე. ხალხიც ძალიან წესიერი და მოწესრიგებულია. ჩვენთან შედარებით ნაკლებად ემოციურები არიან” – თქვა კაშიამ.