საქართველოს ნაკრების ფეხბურთელმა ოთარ კიტეიშვილმა, შესაძლოა, მონაწილეობა მიიღოს ევრო 2024-ის ჯგუფური ეტაპის დასკვნით მატჩში, რომელიც 26 ივნისს პორტუგალიის წინააღმდეგ შედგება.
გრაცის შტურმის 28 წლის ნახევარმცველი ბოლო დღეებია თავს უკეთ გრძნობს და დღევანდელ ვარჯიშში უკვე ძირითად ჯგუფთან ერთად ჩაებმება. თუკი დაბრუნების პროცესმა პრობლემების გარეშე ჩაიარა, არის შანსი, კიტეიშვილი მინდორზეც ვიხილოთ.
შეგახსენებთ, რომ ოთარმა ევროპის ჩემპიონატის დაწყებამდე მონტენეგროსთან გამართულ ამხანაგურ შეხვედრაში (3:1) კუნთი გაიჭიმა და მას შემდეგ მხოლოდ ინდივიდუალურად ვარჯიშობდა.
შედეგად, კიტეიშვილი ნაკრებს ვერაფრით დაეხმარა თურქეთთან (1:3) და ჩეხეთთან (1:1) ჯგუფური ეტაპის მატჩებში, რითაც დიდი ძალა დაგვაკლდა. ცხადია, თუკი მან სრულად მომჯობინება მოახერხა, პორტუგალიასთან მატჩში სოლიდური შევსება გვექნება.
ბოლო ტურის წინ, ევრო 2024-ის F ჯგუფს 6 ქულით სწორედ პორტუგალია ლიდერობს, თურქეთს 3 ქულა აქვს, ჩეხეთსა და საქართველოს კი – თითო-თითო. ქართველ ფეხბურთელებს, დიდი ალბათობით, პორტუგალიელთა დამარცხება დასჭირდებათ, რათა პლეი ოფში გამსვლელ ნაკრებებს შორის მოხვდნენ.