რუსული კანონის ერთ-ერთი მხარდამჭერის, “ქართული ოცნების” დეპუტატის, გოჩა ენუქიძის კომპანია ბათუმში სამ 54-სართულიან ცათამბჯენს ააშენებს – ინფორმაციას გამოცემა bm.ge ავრცელებს.
ირკვევა, რომ განაშენიანების დეტალური გეგმა ბათუმის საკრებულომ უკვე დაამტკიცა და თამარ მეფის გამზირზე, #1-სა და #5გ-ში მდებარე მიწის ნაკვეთებზე მშენებლობას შპს „სიტი გაიდი“ გეგმავს, რომლის საკუთრებაშიც 16433,0 კვ.მ.-ია.
სწორედ აღნიშნული კომპანიის მფლობელებს შორისაა რაჭა-ლეჩხუმ-ქვემო სვანეთის მაჟორიტარი გოჩა ენუქიძე. კომპანია შპს „სიტი გაიდის“ 47%-იან წილს გოჩა ენუქიძის კომპანია შპს “იბერკომპანი” ფლობს. შპს „სიტი გაიდის“ 33.33%-ს ფლობს მედეა ბოჭორიშვილი, ხოლო 19.67%-ს ბუბა ჩანქსელიანი. კომპანიის დირექტორი კი ნინო დოლიძეა.
რაც შეეხება თავად პროექტს, როგორც გამოცემა წერს, თითოეულ შენობაში 1 166 სასტუმრო ნომერი/აპარტამენტია დაგეგმილი. გეგმის თანახმად, ცათამბჯენებში განთავსდება: სასტუმრო ნომრები, აპარტამენტები, კაზინო, კომერციული დანიშნულების ფართები, რესტორანი, კაფე-ბარი, ლაუნჯი, საცურაო აუზი, სპა, ჯიმი, საქმიანი შეხვედრის ზონები, საკონფერენციო დარბაზი, საბავშვო ზონა, სხვა გასართობ-გამაჯანსაღებელი სივრცეები.