“მადლობას ვუხდი ვენეციის კომისიას კანონის გაუქმების ძლიერი რეკომენდაციისთვის… იმედი მაქვს, ამას გააკეთებენ”, – ამის შესახებ ლიეტუვის საგარეო საქმეთა მინისტრი გაბრიელიუს ლანდსბერგისი X-ზე წერს და რუსულ კანონთან დაკავშირებით ვენეციის კომისიის დასკვნას ეხმაურება.
“როგორც ევროპის საბჭოს მინისტრთა კომიტეტის თავმჯდომარე, მადლობას ვუხდი ვენეციის კომისიას “უცხოური გავლენის” კანონის გაუქმების ძლიერი რეკომენდაციისთვის, და იმედს გამოვთქვამ, რომ საქართველოს ლიდერები ამას გააკეთებენ”, – წერს ლანდსბერგისი.
ცნობისთვის, ვენეციის კომისიამ დასკვნა გამოაქვეყნა, სადაც ის ქართულ ხელისუფლებას კატეგორიულად ურჩევს, რომ რუსული კანონი გააუქმოს. დოკუმენტში წერია, რომ კანონის “ფუნდამენტური ხარვეზები გამოიწვევს მნიშვნელოვან უარყოფით შედეგებს” სიტყვისა და გამოხატვის თავისუფლებების, ასევე პირადი ცხოვრების ხელშეუხებლობის კუთხით.
ვენეციის კომისიას “ქართულ ოცნებაში” უპასუხეს და საგანგებოდ გამართულ ბრიფინგზე განაცხადეს, რომ კომისია ფაქტების დამახინჯებას ახდენს.