კომპანია “ლიმონის” ხელმძღვანელი, გიორგი ოკმელაშვილი პოლიციელებზე თავდასხმის ბრალდებით დააკავეს

სარეკლამო კომპანია “ლიმონის” დამფუძნებელი გიორგი ოკმელაშვილი დააკავეს.

როგორც სოციალურ ქსელში მისი ოჯახის წევრი წერს, ჩხრეკაჩატარდა ოკმელაშვილის სახლში.

შსს-ს განცხადებით, სარეკლამო კომპანია “ლიმონის” ხელმძღვანელი, გიორგი ოკმელაშვილი პოლიციელებზე თავდასხმის ბრალდებით დააკავეს, რაც 7 წლამდე ვადით თავისუფლების აღკვეთას ითვალისწინებს.

შსს–ის ინფორმაციით, გიორგი ოკმელაშვილი 13 მაისის აქციაზე “პოლიციელებზე თავდასხმის” ბრალდებით დააკავეს.

განცხადებაში ნათქვამია, რომ ოკმელაშვილმა აქციაზე პოლიციელს დაზიანებები მიაყენა.

“შინაგან საქმეთა სამინისტროს თბილისის პოლიციის დეპარტამენტის თანამშრომლებმა, ჩატარებული ოპერატიული ღონისძიებებისა და საგამოძიებო მოქმედებების შედეგად, პოლიციელებზე თავდასხმის ბრალდებით 1983 წელს დაბადებული, წარსულში სხვადასხვა დანაშაულისთვის, მათ შორის ძალადობის, ჯანმრთელობის დაზიანებისა და პოლიციელის კანონიერი მოთხოვნისადმი დაუმორჩილებლობისთვის ნასამართლევი გ.ო. თბილისში დააკავეს.

დანაშაული 7 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ გ.ო.-მ მიმდინარე წლის 13 მაისს, თბილისში, პარლამენტის მიმდებარე ტერიტორიაზე გამართულ საპროტესტო აქციაზე, ფიზიკური შეურაცხყოფა მიაყენა შინაგან საქმეთა სამინისტროს თანამშრომლებს. კერძოდ, აქციის მიმდინარეობისას, დაკავებულმა იდაყვისა და მუშტის დარტყმით პოლიციის თანამშრომლებს სახის არეში დაზიანებები მიაყენა. ჩატარებული საგამოძიებო მოქმედებების შედეგად, გ.ო. სამართალდამცველებმა თბილისში დააკავეს.

გამოძიება სისხლის სამართლის კოდექსის 353-ე პრიმა მუხლის პირველი ნაწილით მიმდინარეობს, რაც სამსახურებრივი საქმიანობის შესრულების დროს პოლიციელზე თავდასხმას გულისხმობს.” – წერია განცხადებაში.