ორი კვირაა არ ცხრება სკანდალი, რომელშიც ჩეჩნეთისა და დაღესტნის ხელმძღვანელები – რამზან კადიროვი და სერგეი მელიკოვიც არიან ჩართული.
2024 წლის 14 აპრილს რამზან კადიროვის უახლოესი თანამებრძოლი და რუსეთის საგანგებო სიტუაციების სამინისტროს ჩეჩნეთის დეპარტამენტის უფროსი, ალიხან ცაკაევი დაღესტნელმა პოლიციელებმა დააკავეს არაფხიზელ მდგომარეობაში ავტომობილის მართვისა და დაუმორჩილებლობის გამო.
რუსეთის შს სამინისტროს მიერ გავრცელებულ კადრებში ჩანს, როგორ გადმოათრიეს გენერალი ცაკაევი მანქანიდან და როგორც გააკრეს ის სახით ასფალტზე. პასუხად ჩეჩნეთის რესპუბლიკის ძალოვანი უწყებების წარმომადგენლებმა, სამართლებრივი პროცედურების გვერდის ავლით, მალევე გამოიხსნეს “ტყვეობიდან” თავისიანი, რომელსაც, მიმომხილველების თქმით, რამზან კადიროვის სახელისუფლებო იერარქიაში მნიშვნელოვანი ადგილი უკავია.
- კიდევ რით არის ცნობილი სკანდალში გახვეული ალიხან ცაკაევი?
- რა გავლენას მოახდენს ცაკაევთან დაკავშირებული ინციდენტი რუსეთის ორი მნიშვნელოვანი რესპუბლიკის ურთიერთობაზე?
ალიხან ცაკაევი დააკავეს გერზელის ხიდის საგუშაგოზე, დაღესტან-ჩეჩნეთის ადმინისტრაციულ საზღვართან. რუსეთის შს სამინისტროს ჩრდილოეთ კავკასიის ფედერალური ოლქის სამმართველოს ვერსიით, შემხვედრ ზოლში მოძრავი ავტომობილის მძღოლმა უარი თქვა დამორჩილებასა და საბუთების წარდგენაზე, შემდეგ კი აგინა პოლიციელებს და სცადა გზის გაგრძელება. ავტომობილის გაჩერება მოხერხდა სპეციალური საშუალების – ე.წ. ზღარბის – გამოყენების შემდეგ, ალიხან ცაკაევი (მძღოლი) ავტომობილიდან გადმოიყვანა შვიდმა სამართალდამცველმა. რამდენიმე წყაროს თანახმად, დაკავების მომენტში საგანგებო სიტუაციების სამინისტროს ჩეჩნეთის დეპარტამენტის უფროსი არაფხიზელ მდგომარეობაში იყო.