🎥 “როგორც არ უნდა ინატროთ , მე ვერაფერი შემეხება” – ბიძინა ივანიშვილი ამერიკის გაფრთხილებაზე

ოპოზიცია ოფშორების შესახებ კანონპროექტის მიღებას ,,ბიძინას კანონს” უწოდებს. მათი თქმით, ამერიკის სანქციები გზაშია და ხელისუფლება ცდილობს, ბიძინა ივანიშვილის ოფშორულ ზონაში დაცული ქონება გადაარჩინოს.
კანონპროექტი, რომელიც ოფშორიდან გადმოტანილი აქტივების გადასახადებისგან გათავისუფლებას ითვალისწინებს, პარლამენტმა მესამე მოსმენით მიიღო. დადგენილებას 73-მა დეპუტატმა დაუჭირა მხარი. 9 წინააღმდეგი იყო.

საკანონმდებლო ორგანომ კანონპროექტი დაჩქარებულად, 17 და 18 აპრილს განიხილა.

ის ხელმოსაწერად საქართველოს პრეზიდენტს გადაეგზავნება.

კანონპროექტის მიხედვით, გარდამავალ დებულებებს ემატება ახალი ნაწილი, რომელიც ითვალისწინებს იმას, რომ – შეღავათიანი დაბეგვრის მქონე ქვეყნებში (ე.წ. ოფშორი) რეგისტრირებულ აქტივები, საქართველოში რეგისტირებულ კომპანიაზე გადმოფორმების შემთხვევაში, გათავისუფლებული იყოს მოგების/საშემოსავლო და იმპორტის გადასახადისგან.

საუბარია ისეთ საგადასახადო შეღავათებზე, რომელიც გავრცელდება აქტივებზე, რომელიც „დღეს ოფშორულ კომპანიაშია თავმოყრილი და გადმოეცემა იმავე ოფშორის მფლობელი ფიზიკური პირის კონტროლქვეშ არსებულ ქართულ კომპანიას”.

ოპოზიცია კანონპროექტს აკრიტიკებს და მას ბიძინა ივანიშვილის შესაძლო სანქცირებას უკავშირებს. დეპუტატების შეფასებით საქართველო „შავი ფულის სამრეცხაოდ“ გადაიქცევა.
აღსანიშნავია, რომ ბიძინა ივანიშვილის სახელს ოფშორების შესახებ მიმდინარე სკანდალი რვა წლის წინაც უკავშირდებოდა.
მაშინ, ,,ტაბულას” ჟურნალისტმა ექს-პრემიერს ჰკითხეს, შეიძლებოდა თუ არა მას პირადად შეხებოდა, აშშ-ის გაფრთხილება “კონკრეტული პოლიტიკური შედეგების“ შესახებ, რაზეც ივანიშვილმა უპასუხა, რომ მას ვერაფერი შეეხებოდა. ივანიშვილმა ასევე თქვა, შეშფოთება გადაჭარბებული იყო და ამის საფუძველი ,,ნაციონალური მოძრაობის” ლობისტური საქმიანობა იყო.