პრეზიდენტ სალომე ზურაბიშვილის განცხადებით, ის ლაზარე გრიგორიადისს შეიწყალებს.
„გადაწყვეტილება მივიღე დღეს დილით, 10 საათზე, არ დაველოდე არც არავის მოწოდებას. ასე რომ, ვერავინ ჩაითვლის ქულებს. მე ჩემი სინდისის წინაშე ჩავთვალე, რომ არ შეიძლება, ეს ახალგაზრდა 9 წლით დაისაჯოს. ხელი ჯერ არ მომიწერია, არის პროცედურები.
გადაწყვეტილება არის მიღებული ყველანაირი გამოთქმული აზრის გარეშე. ამაზე ვფიქრობდი რამდენიმე დღე, თუმცა სანამ არ იქნებოდა გამამტყუნებელი განაჩენი, მანამდე ვერაფერს გადავწყვეტდი“, – აღნიშნა ზურაბიშვილმა ჟურნალისტ ინგა გრიგოლიასთან საუბრისას.
ხანგრძლივი სასამართლო პროცესის შემდეგ, ლაზარე გრიგორიადისი თბილისის საქალაქო სასამართლომ დამნაშავედ სცნო და 9-წლით თავისუფლების აღკვეთა მიუსაჯა.
დღეს დილით სასამართლოს დასკვნით სხდომაზე გრიგორიადისს 2-ვე მუხლზე პატიმრობა მიესაჯა – გრიგორიადისი დამნაშავედ ცნეს როგორც პოლიციელზე თავდასხმის, ასევე სახელმწიფო ქონების დაზიანებისთვის.
გრიგორიადისისთვის აღნიშნული განაჩენი მოსამართლე ზვიად შარაძემ გამოიტანა.