პოლიტიკოსი გოგი წულაია, მას შემდეგ რაც მას საფრანგეთმა თავშესაფარზე უარი უთხრა, უკვე მესამე თვეა თავშესაფარის მიღებას ბელგიაში ცდილობს. “ა,ბები კი”–სთან საუბარში ამბობს, რომ საფრანგეთში ბიძინა ივანიშვილის გავლენებმა იმოქმედა.
შეგახსენებთ, პოლიტიკოსი სექსუალური ძალადობის ბრალდებით 2021 წლის 17 მარტს დააკავეს, მას წინასწარი პატიმრობა 3 თვით მიესაჯა, გარკვეული დროის განმავლობაში პოლიტიკოსი შიმშილობდა, რის გამოც მისი ჯანმრთელობის მდგომარეობა რამდენჯერმე დამძიმდა. ოპოზიციონერი პოლიტიკოსი საპატიმროდან იმავე წლის 1-ლ ივლისს გაათავისუფლეს. სასამართლო პროცესზე მოსამართლემ ადვოკატის შუამდგომლობა დააკმაყოფილა და მას 6 000-ლარიანი გირაო შეუფარდა. პროკურატურა აღნიშნულ გადაწყვეტილებას არ დაეთანხმა და სააპელაციო წესით გაასაჩივრა, რაც თბილისის სააპელაციო სასამართლომ დააკმაყოფილა და მსჯავრდებულს 4 წლით თავისუფლების აღკვეთა განუსაზღვრა. ამ დროისთვის პოლიტიკოსი უკვე ქვეყნიდან იყო წასული და თავშესაფარს საფრანგეთში ითხოვდა.
– ბატონო გოგი, სად ცხოვრობთ ახლა, რომელ ქვეყანაში და რა სტატუსით?
– ახლა ბელგიაში ვარ, ბრიუსელთან ახლოს პატარა ქალაქში. აქ მცხოვრებლებს “დუბლინები” გვქვია. მაგალითად, ადამიანები, როდესაც რომელიმე ქვეყანაში ბარდებიან და იქ ვერ მიიღებენ სტატუსს, შემდეგ გადადიან სხვა ქვეყანაში, ასეთ ადამიანებს “დუბლინებს” ეძახიან. მე თავიდან საფრანგეთში ჩავბარდი.