რუსთავში, ე.წ. სტამბულის ბაზრობაზე დღეს გახსნილი ცეცხლის შედეგად 4 ადამიანი დაიღუპა, ერთი კი დაიჭრა.
ერთ-ერთი მათგანი, ტაქსის მძღოლი, პაატა მჭედლიძეა.
როგორც „პრაიმტაიმს“ ახლობელი უყვება, მას 4 შვილი დარჩა.
„პაატა მჭედლიძე, ტაქსის მძღოლი იყო. 4 შვილი დარჩა, მეუღლე თვითონ სტამბულის ბაზარში მუშაობდა“,- აცხადებს ახლობელი.
ცნობისთვის, დღეს რუსთავში, ე.წ. სტამბოლის ბაზრობის ტერიტორიაზე შეიარაღებულმა პირმა ცეცხლი გახსნა. სროლის შედეგად მოკლულია ოთხი პირი, მათ შორის ერთ-ერთი ბრალდებულის ბიძაა, რომელიც აღნიშნულ ბაზარში იყო დასაქმებული. ხოლო დაჭრილია ერთი პირი, ბრალდებულის ბიძაშვილი.
შსს-ის ცნობით, ბაზრის ტერიტორიაზე რამდენიმე გასროლა განახორციელა 1988 წელს დაბადებულმა გ.ო.- მ. სამართალდამცველებმა გ.ო. შემთხვევის ადგილზე დააკავეს.
„ტვ პირველის“ წყაროს ცნობით, მამაკაცს კონფლიქტი ჰქონდა ბიძასთან, რომელმაც სამსახურიდან გაუშვა და, შურისძიების მიზნით, თავს დაესხა მას.
არსებული ინფორმაციით, კაცი, რომელიც ოთხი ადამიანის მკვლელობაშია მხილებული, ფსიქიატრიულ დაწესებულებაში მკურნალობდა. ეჭვმიტანილმა კლინიკა ორი თვის წინ დატოვა.