პარლამენტში მინისტრთა კაბინეტის კანდიდატურების მოსმენა მთელი დღის განმავლობაში ხმაურის ფონზე მიმდინარეობდა.
“დამამშვიდებლის გარეშე გამოგიშვეს დღეს სახლიდან?”, – ასე უპასუხა კულტურისა და ძეგლთა დაცვის მინისტრობის კანდიდატმა, თეა წულუკიანმა, დეპუტატ თაკო ჩარკვიანის რეპლიკას: “ტაში ამხანაგებო, ტაში“.
თაკო ჩარკვიანი აღნიშნული რეპლიკით პარტია “ქართული ოცნების“ დეპუტატის, რიმა ბერაძის სიტყვით გამოსვლას გამოეხმაურა, რომელმაც თეა წულუკიანს ჩუბინაშვილის ქუჩაზე არსებული ილია ჭავჭავაძის მუზეუმის რეაბილიტაციისთვის მადლობა გადაუხადა.
აღსანიშნავია, რომ “კანონი და სამართლის” დეპუტატს, თამარ ჩარკვიანს კომიტეტის თავმჯდომარე, ზაზა ლომინაძემ სხდომათა დარბაზი დაატოვებინა.
მანამდე ჩარკვიანმა სიტყვით გამოსვლა საპარლამენტო უმრავლესობის დეპუტატს, მიხეილ სარჯველაძეს შეაწყვეტინა, რის შემდეგაც ჩარკვიანს დარბაზის დატოვებისკენ მოუწოდეს.