სახელმწიფო უსაფრთხოების სამსახურში “ალტ ინ ფოს” წევრის, ბექა ვარდოსანიძის გამოკითხვა დასრულდა.
ვარდოსანიძის დაკითხვა ტერორიზმის შესახებ ცრუ შეტყობინების ფაქტზე 11 საათი მიმდინარეობდა.
როგორც ვარდოსანიძემ სუს-ის შენობიდან გამოსვლის შემდეგ ჟურნალისტებს განუცხადა, მას კუთვნილი ტექნიკა ჩამოართვეს.
„მე არაფერი მაქვს დასამალი. ტექნიკა ჩამომართვეს მთლიანად. ვეღარ გავაგრძელებ ჩემს მაუწყებლობას და ინფორმაციის გავრცელებას. ბევრი ადამიანი შეიძლება იყოს, ვისაც პოლიტიკური აქტივობიდან გამომდინარე პრივილეგიები დაკარგა და შეიძლება გამწარებული იყოს. ცოტა სასაცილოა, ჩემი სამუშაო მეილიდან, რომელიც ჩემთან არის ასოცირებული, ხდება მეილების გაგზავნა. გიჟი უნდა ვიყო, რომ მეილით, რომელიც ჩემთან არის ასოცირებული, ასეთი შეტყობინება გავაგზავნო და მთელი ქვეყანა დავაყენო ფეხზე. ცოტა არ იყოს სასაცილოა“, – განაცხადა ბექა ვარდოსანიძემ.