შეიძლება თუ არა ეკლესიაში შესვლა ქალისთვის მენსტრუაციული ციკლის დროს – ამ საკითხზე “მეტრონომმა” ინტერვიუ მამა პეტრე კოლხთან ჩაწერა.
“სიმართლე გითხრათ, პირადად მე ასეთი საკითხები მეპრიმიტიულება, იმიტომ რომ ადამიანებმა რელიგია ძალიან პრიმიტიულ დონეზე დაიყვანეს. როდესაც პიროვნებას გულით ლოცვა და სინანული სურს, შეუძლია შორიდან მაინც დადგეს, ილოცოს და გამოხატოს თავისი დამოკიდებულება სიწმინდეების მიმართ. მესმის რომ ეს ყველაფერი ჰიგიენური თვალსაზრისითაც არ არის სახარბიელო მდგომარეობა და არ არის აუცილებელი ამ დროს ქალმა სანთლები აანთოს და სიწმინდეებს მიეახლოს.
ის დამოკიდებულება, რომ გინდა თუ არა ამ დროს რატომ არ ხდება ცოტა გადაჭარბებული მგონია. როცა ციკლი არ აქვთ ქალბატონებს თუ ისე დადიან ტაძარში და გამოხატავენ სინანულს, ვფიქრობ, ესეც საკმარისია. სინანული შეიძლება ნებისმიერ სიტუაციაში ჰქონდეს ადამიანს, თუნდაც ტაძარში მისვლის გარეშე. შეიძლება მივიდეთ ტაძარში ავანთოთ სანთლები, ვიდგეთ სიწმინდეების წინ და სინანული მაინც არ გაგვაჩნდეს”
კითხვაზე, თუ რატომ არ შეიძლება ეკლესიაში სანთლის დანთება და სიწმინდეებთან მიახლოება, სასულიერო პირმა გვიპასუხა, რომ რელიგიური სწავლების თანახმად, ეს გამომდინარეობს ქალის დაცემული ბუნებიდან.
“ეს არის ბიოლოგიური მდგომარეობა, რომელიც ქალის ორგანიზმში ვითარდება. როგორც რელიგიური სწავლება გვეუბნება, ეს გამომდინარეობს ქალის დაცემული ბუნებიდან, როდესაც მან მიიღო ის აკრძალული ნაყოფი. როგორც ბიბლიაში წერია, ჩვენ სწორედ ქალის მეშვეობით დავკარგეთ სამოთხე. ამას აქვს ღრმა შორეული ფესვები, რომელსაც ვერცერთი ქალბატონი გვერდს ვერ აუვლის.
როგორც მაგალითად მთვრალმა ადამიანმა არ უნდა წაბილწოს და მიეახლოს სიწმინდეებს აქაც შეიძლება ითქვას ზუსტად იგივე სიტუაციაა. არ უნდა მოხდეს უტრირებულად, რომ მე ახლა მინდა. თავად ადამიანმა არ უნდა ინებოს, როცა არის ასეთ მდგომარეობაში, რადგან თვითონაც იგრძნობს თავს უხერხულად. შორიდან ღმერთთან კომუნიკაცია და კრძავლა ყველა ადამიანს შეუძლია”