ცნობილი მეცნიერი და არქეოლოგი ამირან კახიძე გარდაიცვალა. სამწუხარო ინფორმაცია სოციალურ ქსელში ვრცელდება.
“ნიკო ბერძენიშვილის ინსტიტუტი ღრმა მწუხარებას გამოთქვამს ცნობილი მეცნიერის, არქეოლოგისა და საზოგადო მოღვაწის ამირან კახიძის გარდაცვალების გამო.
ამირან კახიძის სამეცნიერო მოღვაწეობა მჭიდროდაა დაკავშირებული ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტთან. სწორედ აქედან დაიწყო მისი არქეოლოგიური და სამეცნიერო საქმიანობა, რაც მომავალი კარიერული წინსვლის საფუძველიც გახდა. მას ინსტიტუტში მოღვაწეობის წლებმა და გამოცდილებამ მისცა საფუძველი, რომ აჭარაში დაეარსებინა ბათუმის არქეოლოგიური მუზეუმი. შემთხვევითი არც ისაა, რომ ბატონი ამირანი არის აჭარაში არქეოლოგიური სკოლის მესაძირკვლეც.
დიდია ბატონი ამირანის წვლილი რეგიონში არქეოლოგთა პროფესიულად ჩამოყალიბების საქმეში. დიახ, ის არაერთი არქეოლოგის მოძღვარი და გზის გამკვალავია.
ბატონი ამირანი დიდბუნებოვანი, ადამიანური ღირსებით, მამაშვილური დამოკიდებულებით გამორჩეული პიროვნება გახლდათ.
მისი გარდაცვალება დიდი დანაკლისია ქალაქისათვისს, მისი მშობლიური კუთხისათვის, საერთოდ, სამეცნიერო საზოგადოებისათვის.
უფალმა ცათა სასუფეველი დაუმკვიდროს მის სულს” – ნათქვამია განცხადებაში.