2 ნოემბერს სრულიად საქართველოს კათოლიკოს-პატრიარქის, ილია მეორის მოწვევით, საქართველოს მართლმადიდებელი ეკლესიის წმინდა სინოდის სხდომა გაიმართება. აღნიშნულ ინფორმაციას საქართველოს საპატრიარქოს საზოგადოებასთან ურთიერთობის სამსახური ავრცელებს.
„2023 წლის 2 ნოემბერს, 12:00 საათზე, უწმინდესისა და უნეტარესის, სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის და ბიჭვინთისა და ცხუმ-აფხაზეთის მიტროპოლიტის, ილია მეორის მოწვევით გაიმართება საქართველოს მართლმადიდებელი ეკლესიის წმინდა სინოდის სხდომა. აღსანიშნავია, რომ წელს სინოდის სხდომა მეორედ ტარდება. პირველად წმინდა სინოდი 2023 წლის 14 თებერვალს შეიკრიბა“ – აღნიშნულია საპატრიარქოს ინფორმაციაში.
მეუფე იოანე გამრეკელმა “კურიერს” განუცხადა, სინოდის სხდომაზე ერთ-ერთი საკითხი მე-10 საუკუნეში მცხოვრები დიდი მოღვაწეების წმინდანად შერაცხვის საკითხი იქნება.
“წელიწადში ორჯერ იკრიბება სინოდი – გაზაფხულსა და შემოდგომაზე. წესია ასეთი. ადრე, კოვიდის გამო, ჩვენ ორი წელი არ შევკრებილვართ. ერთ-ერთი საკითხი, მე რაც ვიცი, არის წმინდანად შერაცხვა იმ დიდი მოღვაწეების, რომლებიც მე-10 საუკუნის დასაწყისში და ბოლოს მოღვაწეობდნენ. კომისიის ერთ-ერთი წევრი ვარ და ვიცი, რომ ეს საკითხი დაისმება კომისიაზე. თუმცა რამდენიმე კომისიაა და ყველა კომისია თავის საკითხს ამზადებს” – განაცხადა მეუფე იოანემ.