„კობას თავში ესროლა და თურმე ბავშვის მოკ­ვლასაც აპირებდა… “ – ქართველი ემიგრანტის მკვლელობის დეტალები

საბერძნეთში საქართველოს მოქალაქე მოკლეს. 50 წლამდე ქართველი ემიგრანტი 74 წლის ბერძენმა ცოლ-შვილის თანდასწრებით მოკლა. დაჭრილია მოკლულის მეუღლეც.

ადგილობრივი მედიის ცნობით, მომხდარს წინ მხარეებს შორის შელაპარაკება, ან დაპირისპირება არ უძღოდა.

ერთ-ერთი ვერსიით, მკვლელობაში ბრალდებული დარწმუნებული იყო, რომ ქართველმა ემიგრანტმა, რომელთანაც მანამდე მეგობრობდა, მას სასმელში “რაღაც ჩაუყარა”. სწორედ ეს გახდა თავდასხმის მიზეზიც.

ბერძნული მედია წერს, რომ შემთხვევა ათენში, 02:30 საათზე მოხდა – თავდამსხმელი წყვილის სახლში შეიარაღებული მივიდა და ქართველ კაცს ესროლა. ის პოლიციამ უკვე დააკავა.

სხვა ვერსიაზე საუბრობს საბერძნეთში მცხოვრები ქართველი ემიგრანტი. რომელიც ამბობს, რომ დაბადების დღის სუფრაზე ბერძენი კაცი, მასპინძლის შვილს ცუდად უყურებდა, რაც კობას შეუნიშნავს. ამას მოჰყოლია კონფლიქტი.

სტუმრები რომ დაიშალნენ, შუაღამეს მიუვარდა სახლში ის კაცი კობას, კობას ესროლა თავში, შვილის მოკვლასაც აპირებდა და დედა გადაეფარა, რომელიც ახლა დაჭრილი, საავადმყოფოშია“,- ამბობს ambebi.ge-სთან ქართველი ემიგრანტი.