ფორთოხალი — მარადმწვანე ხეხილი ციტრუსის გვარის ტეგანისებრთა ოჯახისა. ველურად არ გვხვდება. ძლიერ საძირეზე დამყნილი 12 მ-მდე იზრდება, სუსტზე 4—6 მ-მდე. აქვს ტყავისებრი, ოვალური, მუქი მწვანე ფოთოლი. ორსქესიანი, თეთრი, სურნელოვანი, მარტოული ან ყვავილელად შეკრებილი ყვავილი, მრავალბუდიანი კენკრა ნაყოფი.
ფორთოხალი შეიცავს კალიუმს, ასევე, A პროვიტამინს, B1 ვიტამინს, C ვიტამინს, ფოლის მჟავას, მაგნიუმს, მანგანუმს, ფოსფორს, რკინას, სპილენძსა და თუთიას.
ფორთოხალი ბევრ დაავადებას ებრძვის, დაგვიცავს სავალალო შედეგებისგან. მას ორგანიზმიდან გამოაქვს ნივთიერებათა ცვლის ნარჩენები და ტოქსინები. კარგი იქნება, თუ კვირაში ერთ დღეს მხოლოდ ფორთოხალს მიირთმევთ, დაახლოებით ექვს-შვიდ ცალს, ან, ახალგამოწურულ წვენს დალევთ.
ფორთოხალი აძლიერებს იმუნიტეტს, აქვეითებს სისხლში ქოლესტერინის დონეს, კარგად მოქმედებს გულ–სისხლძარღვთა სისტემის მუშაობაზე. ციტრუსის მუდმივი მოხმარება დადებით გავლენას ახდენს კუჭ–ნაწლავის ტრაქტის მუშაობაზე. მას ორგანიზმიდან გამოაქვს შლაკები და დიდხანს მიღებისას დადებითად მოქმედებს კუჭის შეკრულობის დროს.
ხილი რეკომენდებულია ავიტამინოზის მკურნალობისას, გაციების პროფილაქტიკისთვის. С–ვიტამინისა და კალიუმის წყალობით, ის აუმჯობესებს ადამიანის მდგომარეობას ჰიპერტონიის, ათეროსკლეროზისა და ჭარბცხიმიანობის დროს.
ფორთოხლის წვენს, ნაყოფის მსგავსად, აქვს ანტიმიკრობული და ანთების საწინააღმდეგო, ასევე მატონიზირებელი მოქმედება. ის რეკომენდებულია ნერვული სისტემის დაავადებების, პოდაგრის დროს, ვირუსული დაავადებების გადატანის შემდეგ ორგანიზმის აღსადგენად.