B12 ვიტამინის ეფექტების კვლევამ, წონის კლებასთან დაკავშირებით, არაერთგვაროვანი შედეგები აჩვენა.
B12 ვიტამინი წყალში ხსნადი ვიტამინია, რომელიც აუცილებელია ჯანმრთელობისთვის. ეს ვიტამინი მონაწილეობს დნმ-ისა და სისხლის წითელი უჯრედების ფორმირებაში, ასევე აუცილებელია ტვინის ფუნქციონირებისთვის, გულის ჯანმრთელობისთვის, ენერგიისთვის. ის ბუნებრივად გვხვდება ბევრ ცხოველურ პროდუქტში.
B12 ვიტამინის გავლენა სხეულის ცხიმებსა და მეტაბოლიზმზე
ზოგიერთი კვლევა ვარაუდობს, რომ B12 ვიტამინმა შეიძლება გავლენა იქონიოს სხეულის ცხიმებსა და მეტაბოლიზმზე. მიმოხილვამ დაასკვნა, რომ B12 ვიტამინი მნიშვნელოვან როლს ასრულებს ცხიმის მეტაბოლიზმში, ხოლო დეფიციტი შეიძლება დაკავშირებული იყოს ცხიმის დაგროვებასთან და სიმსუქნესთან.
ცხოველებზე ჩატარებულმა კვლევამ აჩვენა, რომ B12 ვიტამინის მძიმე დეფიციტმა გამოიწვია სხეულის ცხიმის პროცენტული და ქოლესტერინის დონის მნიშვნელოვანი ზრდა.
ცხოველებზე ჩატარებული სხვა კვლევის თანახმად კი, სადაც მათ ცხიმიან საკვებს აძლევდნენ, B ჯგუფის ვიტამინების მიღებამ შეაფერხა წონის მატება და გაზარდა რამდენიმე ფერმენტის დონე, რომლებიც გავლენას ახდენენ მეტაბოლიზმზე.
თუმცა, საჭიროა დამატებითი კვლევები, რათა დადგინდეს, თუ რა გავლენა შეიძლება იქონიოს B12 ვიტამინმა მეტაბოლიზმზე და სხეულის ცხიმზე ადამიანებში.
B12 ვიტამინის ნაკლებობა შეიძლება დაკავშირებული იყოს სიმსუქნესთან
რამდენიმე კვლევამ აჩვენა, რომ B12 ვიტამინის ადეკვატური დონე შეიძლება ასოცირდებოდეს წონის მომატებისა და სიმსუქნის დაბალ რისკთან.
გამოკვლევის თანახმად, რომელიც ჩატარდა 9075 ადამიანში, სისხლში B12 ვიტამინის მაღალი დონე ასოცირდება სიმსუქნის დაბალ რისკთან. ანალოგიურად, სხვა კვლევამ (მონაწილეობდა 976 ადამიანი) აჩვენა, რომ B12 ვიტამინის დაბალი დონე დაკავშირებულია ჭარბი წონის ან სიმსუქნის უფრო მაღალ რისკთან.
რომ მიუხედავად იმისა, რომ ეს კვლევები აჩვენებს კავშირს B12 ვიტამინის სტატუსსა და სხეულის წონას შორის, საყურადღებოა, რომ ისინი არ ითვალისწინებენ სხვა პოტენციურ ხელშემწყობ ფაქტორებს. აქედან გამომდინარე, არ შეიძლება დავასკვნათ, რომ B12 ვიტამინი იწვევს წონის კლებას. საჭიროა მეტი გამოკვლევა იმის დასადგენად, პირდაპირ მოქმედებს თუ არა B12 ვიტამინი სხეულის წონაზე ან სხეულის მასის ინდექსზე.
წყარო: მკურნალი