ჟურნალისტი თეა გვასალია სოციალურ ქსელში სახალისო პოსტს აქვეყნებს.
ამბავი, რომელსაც გვასალია ჰყვება, ერთ შუახნის ქალბატონს გადახდა თავს.
„შტერად რომ დაიბადები ქალი, არც ესპანეთი გიშველის და არც ამერიკა. ერთ შუახნის, გრანადელ ქალს თურმე ვიღაც ალფონსი სწერდა ბრედ პითის სახელით, მის ფოტოებს უგზავნიდა, უმტკიცებდა, რომ ამ მიმოწერაში უგონოდ შეუყვარდა, რომ ჰოლვუდში გადაღებებს ტოვებდა და ესპანეთში ჩასვლას აპირებდა მის სანახავად, ცოლად მოსაყვანად და ფილმში გადასაღებად. ოღონდ იყო ერთი პატარა ნიუანსი, იმ წუთში „პითს“, რომლის ქონებაც 300 მილიონ დოლარადაა შეფასებული, ბილეთის ფული არ ჰქონდა და ლოს ანჯელესიდან მადრიდში, იქიდან კი გრანადაში ჩასაფრენად 170 000 ევროს ითხოვდა სესხად, რომელსაც ცხადია, შეხვედრისთანავე დაუბრუნებდა. ამ სულელმაც რამდენიმე ტრანსფერით გადაურიცხა თანხა, დარჩენილი ფული თავის მოწესრიგებასა და ვნებიანი ანდალუსიური ღამეების შესაფერის, ალისფერ საცვლებსა და ღრმა დეკოლტიან კაბებში დახარჯა და ერთკვირიანი ამაო ლოდინის შემდეგ, ადგილობრივ სასამართლოში შეიტანა სარჩელი. მტკიცებულებებად მსახიობის ფოტოები წარადგინა, რომელთა ქვეშაც ანჯელინა ჯოლის ყოფილი ქმარი, თავის დულსინეას ესპანურად უხსნიდა სიყვარულს.
აქ ვინ გამოტყდება, თორემ რამდენი ასეთი ქალი წამოჰგებია „საყვარელი ადამიანის“ დაპირებების ანკესს. მედუზასავით უტვინოებს „მომავალი ქმრის“ მომავალი ბიზნესიც დაუფინანსებიათ, ვალებიც უსტუმრებიათ და მანქანის საყიდლად „დაკლებული“ თანხაც დაუმატებიათ. კაცს ორი ავტობუსი ცოლ-შვილი ჰყავს უპატრონოდ დაყრილი და ამ ერთუჯრედიანებს სჯერათ, რომ ამ არაჩვეულებრივ ადამიანს უბრალოდ არ გაუმართლა ცხოვრებაში, ვერც ერთმა ქალმა ვერ გაუგო, მაგრამ მთლად ბოლომდე არ გასწირა ღმერთმა და სწორედ მათი სახით მოუვლინა არაამქვეყნიური სიყვარული, ცოტაც ( ერთი 15 წელი) უნდა მოითმინონ, შეიცვლება მთავრობა, წყობილება, ფული, ბიზნესგარემო… მათი რაინდიც დადგება ფეხზე და დედოფალივით აცხოვრებს. რაღა დროს რუსული წარწერებია, თორემ ჩემი ნება რომ იყოს, რესტორნების, კაფეების, სასტუმროების და რა ვიცი, კიდევ სად დადიან შეყვარებულები, ფოიეებში დიდი, თვალშისაცემი, წითელი ასოებით გამოვაკრავდი შეგონებას:
Помни, твой новый “принц” – это чей-то бывший “козёл”“, – წერს ის.