ფსიქიატრმა, გიორგი ჭეიშვილმა “მთავარი არხის” გადაცემაში “მთავარი დიაგნოზი” რუსეთის პრეზიდენტის ვლადიმერ პუტინის ფსიქიკური მდგომარეობა განიხილა.
“დასავლეთში ბევრს წერენ და ამბობენ, რომ მას სერიოზული ფსიქიკური პრობლემები აქვს და ამის გამო ხდება ის, რაც ხდება. ალბათ მართლა აქვს ფსიქიკური პრობლემები, მაგრამ ეს არ არის იმ დონის, რომ ის იყოს კლინიკური ავადმყოფი. მძიმე ფსიქიკური პრობლემების მქონე პირი, ვერ შეძლებს გახდეს ქვეყნის პრეზიდენტი და შეინარჩუნოს თანამდებობა 20 წლის განმავლობაში, თუნდაც, ისეთ უკუღმართ ქვეყანაში, როგორიც არის რუსეთი.
ჩემი აზრით, ეს კაცი (პუტინი) იგივეა 2022 წელს, რაც იყო 2008 წელს, როდესაც საქართველოს თავს დაესხა, და რაც იყო 1999 წელს, როდესაც მოსკოვსა და სხვა ქალაქებში სახლებს აფეთქებდა. დიდ ცვლილებას ვერ ვხედავ.
მას (პუტინს) მძიმე, ანომალიური ცუდი ხასიათი, ეს გასაგებია, იმიტომ აკეთებს იმას, რასაც აკეთებს, მაგრამ საილუსტარციოდ მინდა გითხრათ, თუ ის ოდესმე მოესწრება, რომ მართლმსაჯულების წინაშე წარსდგეს, ალბათ აღნიშნავენ მისი ხასიათის სირთულეებს და ა.შ. მაგრამ აი, ექსპერტი ფსიქიატრების ჟარგონზე რომ ვთქვათ, წავა შერაცხადად, ანუ მას პასუხს აგებინებენ თავის დანაშაულებზე. არ დაწერენ იქ, რომ მას აქვს ისეთი დაავადება, რომელიც უკარგავს შერაცხადობას.
მემგონი, ის არ გაჩერდება, იმიტომ, რომ მის თავში სამყაროს როგორი სურათიც არის დახატული, იმ სურათში ის არის მსხვერპლი და თავს იცავს. თუ არ გააჩერეს, არ გაჩერდება. ახლა მიდის თავის მტვრევა გაბედავს თუ არა ტაქტიკური ბირთვული იარაღის გამოყენებას, თუ არ გააჩერეს, გაბედავს.
საშუალო ნიჭის მქონე ადამიანს, უკვე 22-ე წელია გარემოცვა უმტკიცებს, რომ ის არის გენიალური, განუმეორებელი, განსაკუთრებული, მარტივად რომ ვთქვათ თავში აუვარდა – დაიჯერა. ის კარგავს ადეკვატურობას, გარემოს რეალისტურ და საკუთარი თავის აღქმას და ბევრ რამეზეა წამსვლელი.
ფსიქოზი მას არ აქვს, სულით ავადმყოფი არ არის, უყვარს საკუთარი თავი და უნდა დიდხანს სიცოცხლე. მოკლედ, მას აქვს ანომალიური ხასიათი, რომელსაც ადრე ფსიქოფატიას ეძახდნენ, ახლა ვეძახი პერსნოლოგიურ აშლილობას. მაგრამ მინდა ვთქვა, რომ ასეთი ფსიქოფატებით მთელ მსოფლიოში ციხეები სავსეა. ისინი მიდიან და იხდიან სასჯელს, არავინ მათ არ უშვებს სამკურნალოდ, რადგან არც საზოგადეობა, არც მედიცინა, არც სასამართლო ფსიქიატრია, არც სასამართლო მათ შეურაცხად პირებად არ თვლიან.
შექმნილი გარემოებების გამო, ახლა ალბათ მისი ფსიქოლოგოური მდგომარეობა კატასტროფულია, მაგრამ ჩემი აზრით, მნიშვნელოვანი არა ის არის, თუ რა ხდება პუტინის თავში, არამედ, რა ხდება მილიონობით რუსის თავში, რომელიც თავს აიგივებს პუტინთან, რომლებიც საკუთარ თავს ცნობენ პუტინში, ეს უფრო მნიშვნელოვანი პრობლემაა, მაგრამ ეს სცდილდება ფსიქიატრიას, ეს უფრო ფილოსოფოსების, სოციოლოგების და ასეთი სპეციალობების ხალხის საკვლევია”, – ამბობს გიორგი ჭეიშვილი გადაცემაში “მთავარი დიაგნოზი”.
16,587 სულ ნახვები
კომენტარები
0 კომენტარები
