“ერთიანი ნაციონალური მოძრაობის” წევრი ნიკა მელია სოციალურ ქსელში შემდეგი სახის ინფორმაციას ავრცელებს:
“კიდევ ერთი კარგი ამბავი…
საერთაშორისო ოლიმპიურმა კომიტეტმა დაიწყო განხილვა ყველა შეჯიბრებიდან
რუსი სპორტსმენების მოხსნის საკითხი.
უკვე ლაპარაკია არა მხოლოდ რუსეთის დროშით და ჰიმნით მონაწილეობის აკრძალვაზე (როგორც ახლაა), ანუ რუსეთის სახელით, არამედ ყველა იმ სპორტსმენის დაბლოკვაზე, რომელიც რუსეთის მოქალაქეა.
რუსი სპორტსმენები მხოლოდ იმ შემთხვევაში გამოვლენ სპორტულ შეჯიბრებებზე, თუ სხვა ქვეყნის მოქალაქეობას მიიღებენ.
უმეტესობა ასეც მოიქცევა. მათ შორის არიან ძალიან დიდი სპორტსმენები და სპორტი მათი ცხოვრებაა.
სხვა ქვეყნის მოქალაქეობის მიღების პროცესი პუტინის რეჟიმის წინააღმდეგ პროტესტად იქცევა, რაც კიდევ უფრო დააზიანებს რეჟიმს.
რუსეთში სპორტი ძალიან გაპიარებულია. რუსი ბიატლონისტები (მაგალითად) ან მოციგურავეები და სხვები დიდი პოპულარობით სარგებლობენ და ახლა თუ რუსები დაინახავენ მათ საყვარელ სპორტსმენებს სხვა ქვეყნის დროშით ხელში, სერიოზულად გაბრაზდებიან პუტინზე.
სპორტი `რბილი ძალის` და ჰიბრიდული ომის ნაწილად პუტინმა აქცია და ახლა დასავლეთმა გადაწყვიტა ეს მის წინააღმდეგვე გამოიყენოს, ამ მხრივაც მაქსიმალურად დააზიანოს პუტინის რეჟიმი “, – წერს მელია “ფეისბუქი”-ს პირად გვერდზე.