ნებისმიერ წუთში ხელისუფლებას რომ სცოდნოდა, საქართველოს მიწაზე დავდიოდი რა თქმა უნდა, პირველი მათი გადაწყვეტილება იქნებოდა – ჩემი მკვლელობა. მე ძალიან კარგად ვიცი, ვისთან მაქვს საქმე. შემდეგ ამას დააბრლებდნენ ვიღაც კრიმინალებს, – ამის შესახებ საქართველოს ექს-პრეზიდენტმა მიხეილ სააკაშვილმა საზღვრის უკანონო კვეთის საქმეზე მიმდინარე სასამართლო პროცესზე სიტყვით გამოსვლისას განაცხადა.
“რა არის სამშობლოს მიზიდულობა და სამშობლოს სიყვარული?! – ეს არის ის, რაც მე ვიგრძენი, როდესაც პირველად ფეხი ჯერ სამეგრელოს მიწაზე დავდე, შემდეგ ბათუმში და სხვა ადგილებში… აი, იმ ერთი წამისთვის რომ თავისუფლად გამევლო ჩემი საყვარელი ქვეყნის მიწაზე, ღირს რომ ადამინი სიკვდილზე წავიდეს. ნებისმიერ წუთში საქართველოს ხელისუფლებას რომ სცოდნოდა, რომ მე დავდიოდი საქართველოს მიწაზე, პირველი მათი გადაწყვეტილება იქნებოდა – ჩემი მკვლელობა. მე ძალიან კარგად ვიცი, ვისთან მაქვს საქმე. შემდეგ ამას დააბრალებდნენ ვიღაც კრიმინალებს, ვიღაც გაურკვეველ ადამიანებს. მე ძალიან კარგად ვიცი, როცა ყოველ ღამე გესიზმრება შენი სამშობლო, რას ნიშნავს, როცა გესიზმრება (აგერ დედაჩემი ზის) ჩემი ეზო პეკინის ქუჩაზე, ჩემი სტადიონი, სადაც ფეხბურთს ვთამაშობ, გესიზმრება შენი სკოლა, მეგობრები, გესიზმრება შენი წინაპრები, რომლებიც შეიძლება აღარ არიან, მაგრამ შენს სიზმრებში არიან და ისინი ჩემთვის საქართველოს უკავშირდებიან… იცი, რომ შენი ქვეყნისთვის თავი გადადე, თითზე გადასახვევი არ წამიღია აქედან, ყველაფერი რისი გაკეთებაც შემეძლო ჩემს ქვეყანას გავუკეთე, და ეს ყველაფერი რაც გავუკეთე, ჩემ თვალწინ ინგრევა, და მე ამ დროს კომფორტში უნდა ვიჯდე უკრაინაში, გამოვიდე აივანზე, მივიღო იქ მინისტრები, პრემიერ-მინისტრი, პრეზიდენტს ვხვდებოდე, ცნობილ ბიზნესმენს ვეურთიერთებოდე, პრინციპში ნორმალური ცხოვრება მქონდეს და ამავე დროს მივიღოთ სიტუაცია, როდესაც ჩემი ქვეყანა თვალსა და ხელს შუა ინგრევა და იღუპება”, – განაცხადა სააკაშვილმა სასამართლო პროცესზე სიტყვით გამოსვლისას.
საქართველოს სახელმწიფო საზღვრის უკანონო კვეთის საქმეზე ბრალდებული ყოფილი პრეზიდენტის, მიხეილ სააკაშვილის საქმის არსებითი სხდომა მიმდინარეობს. სხდომას ესწრება თავად ბრალდებული მიხეილ სააკაშვილიც.
შეგახსენებთ, რომ მიხეილ სააკაშვილის მიერ საზღვრის უკანონო კვეთის ფაქტთან დაკავშირებით გამოძიება პირველ ოქტომბერს დაიწყო. აღნიშნული საქმის ფარგლებში ბრალდება კიდევ 4 პირს – ელგუჯა ცომაიას, ზურაბ და შალვა წოწორიებსა და გიორგი ნარიმანიძეს აქვთ წაყენებული და ის ცალკე წარმოებად მიმდინარეობს.
აღნიშნული პირები ბრალს აღიარებენ.
3,789 სულ ნახვები
კომენტარები
0 კომენტარები
