ჟურნალისტი ნანუკა ჟორჟოლიანი პრემიერის ირაკლი ღარიბაშვილის სახლთან მომხდარ ფაქტს “ფეისბუქის” პირად გვერდზე ეხმაურება. როგორც ტელეწამყვანი აღნიშნავს, “ბავშვებს მშობლის, ბაბუის და ბიძის პოლიტიკური ბატალიები არ უნდა ეხებოდეს.
“დავიწყებ ბოდიშით. ძალიან, ძალიან ვწუხვარ, რომ ირაკლი ღარიბაშვილის უკარგესმა შვილებმა იდარდეს და ინერვიულეს. განსაკუთრებით ვიდარდე ანდრიაზე, რომელიც პატარაა. არასრულწლოვან ბავშვებს არ უნდა ეხებოდეს მშობლის, ბაბუის, ბიძის პოლიტიკური ბატალიები და ჩემგან, პერსონალური ბოდიში მათ.
მაგრამ ბატონო ირაკლი, ეს რა პოლიტიკური ენაა, ან რა სურათებია და შემთხვევით ამ ადამიანებსაც ხომ არ ჰყავთ შვილები, სისხლის ფერში გახვეულ მშობლებს რომ დაინახავენ ყველგან, ქალაქის მასშტაბით. ან, ეს ჩემი შვილი სად შემოგისკუპებიათ. ასე ფიქრობთ არჩევნების ჩატარებას, რომელსაც სიცოცხლით სავსე ქალაქი ჰქვია? თუ, ნაციონალების ამომრჩევლისთვის სისხლს აანონსებთ?!
იმედია ეს ყველაფერი ქალაქიდან გაქრება. მგონია რომ თქვენივე მერობის კანდიდატი ამას არ მოგიწონებთ, სხვანაირად გამოდის სისხლით სავსე ქალაქი. და იმედია აღარავის შვილი აღარ დაისტრესება მშობლის გამო,” – წერს ნანუკა ჟორჟოლიანი სოციალურ ქსელში და აქვეყნებს ფოტოებს.
ცნობისთვის, საქართველოს მთავრობის სტრატეგიული კომუნიკაციების დეპარტამენტის დირექტორმა ნინო გიორგობიანმა სოციალური ქსელის საშუალებით გაავრცელა ვიდეო და აღნიშნა, რომ პრემიერ-მინისტრის მშობლების სახლთან, სადაც ირაკლი ღარიბაშვილის არასრულწლოვანი შვილები ისვენებენ, იმყოფებოდა „ტვ პირველის“ ჟურნალისტი და მათ კითხვებს უსვამდა, ხოლო შემდეგ სახლის ეზოს ფარულად კადრებს უღებდა.