„სიტუაცია მშვიდდება" - გამყრელიძის დამაიმედებელი განცხადება

„ბოლო ერთი თვის, განსაკუთრებით ბოლო ორი კვირის განმავლობაში გამოხატულია ინფიცირების ახალი შემთხვევების კლება. ყველა ის ინდიკატორი, რომელიც 7-14 დღიან ინციდენტობასთანაა დაკავშირებული, უკვე ქვემოთაა წამოსული“, – ამის შესახებ დაავადებათა კონტროლის ეროვნული ცენტრის დირექტორმა ამირან გამყრელიძემ ბრიფინგზე განაცხადა.

მისი თქმით, 100 000 მოსახლეზე ახალი შემთხვევების რიცხვით საქართველომ ევროპაში პირველიდან მე-8 ადგილზე გადაინაცვლა.

„თუ ჩვენ დეკემბრის დასაწყისში 100 000 მოსახლეზე ინციდენტობის მაჩვენებლით ევროპაში ვიყავით პირველ ადგილზე, ახლა ევროპაში ვართ მე-8 ადგილზე, ხოლო მსოფლიოში სადღაც მე-12 ადგილზე, ანუ ეს მაჩვენებელიც მცირდება, ისევე როგორც კუმულაციური სიკვდილიანობის მაჩვენებელი. ამავდროულად, გამოჯანმრთელებულთა მაჩვენებელი დღეს ქვეყანაში არის 92%“, – აღნიშნა ამირან გამყრელიძემ.

როგორც მან განმარტა, დეკემბრის დასაწყისიდან დღემდე ინფიცირების დადებითობის მაჩვენებელი 26%-დან 13%-მდეა შემცირებული.

„აგრეთვე შემცირებულია მიმართვიანობა 112-სა და ცხელ ხაზზე, აგრეთვე კლინიკებში ტესტირებაზე. ეს ნიშნავს, რომ ქვეყანაში ვითარება ოდნავ მშვიდდება, თუმცა ეს დამშვიდების საფუძველს არ გვაძლევს, რადგან თუ რეგულაციებს არ დავიცავთ, სიტუაცია შესაძლოა ყოველ წუთას გამწვავდეს“, – განაცხადა ამირან გამყრელიძემ.

ინფორმაციისთვის, საქართველოში კორონავირუსის 222 143 შემთხვევაა დადასტურებული. გამოჯანმრთელებულია 206 313 და გარდაცვლილია 2 418 ადამიანი.