საქართველოს პრემიერ-მინისტრის, გიორგი გახარიას განცხადებით, თუ კორონავირუსის ახალი შემთხვევების დაბალი მაჩვენებელი ერთი კვირის განმავლობაში შენარჩუნდება, შეზღუდვების ეტაპობრივი მოხსნის პროცესი დაჩქარდება. ამის შესახებ მან მთავრობის სხდომაზე ისაუბრა.
“დღეს ჩენ ვმსჯელობთ, როგორ უნდა მოვახერხოთ, რაც შეიძლება სწრაფად, მაგრამ უსაფრთხოდ დავიწყოთ ეკონომიკის გახსნა.
მაშინ, როცა ჩვენ მიზნობრივი შეზღუდვები დავაწესეთ, ეს იყო დეკემბრის ბოლო და ამას ჰქონდა კონკრეტული მიზანი – მაშინ ვირუსის გავრცელების, ანუ დადებითობის მაჩვენებელი ქვეყანაში იყო უაღრესად მაღალი და ზოგ ქალაქებში 20 პროცენტსაც გადააჭარბა. დღეის მონაცემებით შემიძლია გითხრათ, რომ 18 000 ტესტიდან, რომელიც გუშინ ჩატარდა, დადებითი პასუხი არის მხოლოდ 732, რაც რა თქმა უნდა ჩვენთვის მაინც დიდი რიცხვია, თუმცა ის უკვე მიუახლოვდა 4 პროცენტს.
როდესაც ჩვენ დადებითობის მაჩვენებელი 4% გვექნება, უკვე თამამად, მაგრამ ფრთხილად და გონივრულად შეგვეძლება ეკონომიკის გახსნა 7 დღის განმავლობაში, და როგორც ჩანს, დღევანდელი ტენდენციები გვაძლევს ფრთხილი ოპტიმიზმის საშუალებას.
ამიტომ ჩვენ დღეს უნდა ვიმსჯელოთ იმაზე, რომ თუ მსგავსი ტენდენცია შენარჩუნდა, ისე, როგორც გავაკეთეთ ზაფხულში, ეტაპობრივი გახსნა ახლაც ცოტა უფრო ადრე დავიწყოთ.
ეს ეხება პირველ რიგში თბილისს, ქუთაისსა და რუსთავს და ეს ეხება რა თქმა უნდა საგანმანათლებლო დაწესებულებებს, რომ მივცეთ ჩვენს ბავშვებს საშუალება, სწავლა დაიწყონ სასწავლო კლასებიდან. რა თქმა უნდა ამას თან ერთვის მუნიციპალური ტრანსპორტის ამოქმედებაც. რა თქმა უნდა ეს უნდა გავაკეთოთ ისე, რომ რისკის ქვეშ არ დავაყენოთ ის მიღწევები, რაც გვაქვს”- განაცხადა გახარიამ.