რას ითხოვენ ოკუპანტები ზაზა გახელაძის გათავისუფლების სანაცვლოდ?

უკანონო ქართველი პატიმრის გათავისუფლება უნიკალური ხატის ან საქართველოს დამატებითი ტერიტორიის სანაცვლოდ – სამხრეთ ოსეთის საოკუპაციო რეჟიმი ითხოვს, რომ ჩვენ უკვე საკუთარი ხელით გადავცეთ მათ ქართული მიწის ნაწილი. იგულისხმება ჩორჩანას საგუშაგო; ან გადავცეთ მე-10 საუკუნით დათარიღებული ოქონის ხატი, რომელიც საქართველოს ეროვნულ მუზეუმში ინახება. ამის სანაცვლოდ კი ისინი გაათავისუფლებენ ზაზა გახელაძეს, რომელიც უკვე 9 თვეა უკანონოდ ჰყავთ დაპატიმრებული.

ოკუპანტები ვაჭრობენ ქართველი პატიმრით. ამ დროს ჩვენ ცოტა ხნის წინ დაკავებული რუსი სამხედროები ყოველგვარი წინაპირობის გარეშე გავათავისუფლეთ. მაგრამ თვითონ ზაზა გახელაძე ამბობს, რომ ურჩევნია მისთვის უკანონოდ მისჯილი 12 წელი მოიხადოს ცხინვალის ციხეში, ვიდრე მისი თავისუფლება ქართულ მიწაში ან ისტორიულ ხატში გაცვალონ.

აქვე, ცნობილი ხდება გაუგონარი ფაქტი, რომ რუსებს ამოუთხრიათ იკორთის ტაძარში დაკრძალული წმინდა ბიძინა ჩოლოყაშვილი და ქსნის ერისთავები, შალვას და ელიზბარი და მათი ნეშტები რუსეთში, ჩრდილოეთ ოსეთში გადაუსვენებიათ.

რამდენიმე დღის წინ, საერთაშორისო პარტნიორების დახმარებით ცხინვალში გადაიყვანეს და ზაზა გახელაძეს შეახვედრეს მისი ორი შვილი, მამა და მეუღლე.

ცნობისთვის, ზაზა გახელაძე 2020 წლის ივლისში, რუსმა ოკუპანტებმა, ქართული მხარის მიერ კონტროლირებად ტერიტორიაზე, სხვილოს ციხესთან, სოფელ ქვემო ჭალაში ჯერ ფეხში დაჭრეს, შემდეგ კი გაიტაცეს. 5 თებერვალს ცხინვალის ე.წ. სასამართლომ მას 12,5 წლით პატიმრობა მიუსაჯა.

106 სულ ნახვები