ახალციხეში ყირიმ–კონგოს კიდევ ერთი შემთხვევა დაფიქსირდა

სამცხე–ჯავახეთში ყირიმ–კონგოს ჰემორაგიული ცხელებით კიდევ ერთი ადამიანი დაავადდა. ამჯერად შემთხვევა ახალციხის სოფელ ფერსაში დაფიქსირდა. – ინფორმაციას “სამხრეთის კარიბჭე” ავრცელებს

დაავადებათა კონტროლის ეროვნული ცენტრის ინფორმაციით რეგიონში 32 დადასტურებული შემთხვევაა გამოვლენილი, რომელიც მუნიცპალიტეტების მიხედვით ასე ნაწილდება:

ახალციხის მუნიციპალიტეტი – 16 შემთხვევა;
ადიგენის მუნიციპალიტეტი – 10 შემთხვევა;
ასპინძის მუნიციპალიტეტი – 6 შემთხვევა;

ადამიანებში დაავადება ვლინდება დაავადებულ ტკიპასთან კონტაქტის შემდგომ 1-9 დღეში (კბენა, გაჭყლეტილ ტკიპასთან შეხება), ასევე დაინფიცირებულ სისხლთან ან ქსოვილთან კონტაქტის შედეგად 3-14 დღეში (ცხოველის დაკვლის დროს). დაავადების შემთხვევები, ძირითადად, აღინიშნება გაზაფხულიდან ადრეულ შემოდგომამდე, რადგან ამ პერიოდში აქტიურდებიან დაავადების გადამტანი ტკიპები.

მაღალი რისკის ქვეშ ძირითადად ფერმერები, მწყემსები და ვეტერინარები არიან. ასევე – პირები, რომლებიც ახლო კონტაქტში არიან ყირიმ–კონგოს ჰემორაგიული ცხელებით დაავადებულ ადამიანებთან.