“ერთადერთი, ვინც უნდა წყვეტდეს სააკაშვილის საავადმყოფოში გადაყვანას, არის ექიმი. თუ ის გადაწყვეტს, რომ ციხის საავადმყოფოში სააკაშვილისთვის არ არის შესაბამისი პირობები, მაშინ ის უნდა გადაიყვანონ. თუ ექიმი ობიექტურ საფუძველზე ამბობს, რომ უნდა გადაიყვანონ, მეც ვემხრობი. ვერანაირ მიზეზს ვერ ვხედავ, რატომ არ უნდა ხდებოდეს სააკაშვილის გადაყვანა სამოქალაქო საავადმყოფოში” , – ამის შესახებ პოლიტიკოსის, საქართველოს პარლამენტის ოთხი მოწვევის დეპუტატის კობა დავითაშვილის ვაჟმა, თორნიკე დავითაშვილმა TV – “პირველისთვის” მიცემულ ინტერვიუში განაცხადა.
აღნიშნულ განცხადებას, ჟურნალისტი ნანუკა ჟორჟოლიანი “ფეისბუქის” პირად გვერდზე შემდეგნაირად ეხმაურება:
“კობა დავითაშვილის ბიჭი მიხეილ სააკაშვილის საავადმყოფოში გადაყვანას ითხოვს.
ღმერთო, რა მაგარი შვილი გაუზრდია კობას და მის მეუღლეს”, – წერს ჟორჟოლიანი სოციალურ ქსელში.
ამასთან, თორნიკე დავითაშვილმა ტელეკომპანია “პირველთან” საუბრისას განაცხადა, რომ საზოგადოება ბეწვის ხიდზე გადის, საკმაოდ დაძაბული სიტუაციაა და ამიტომ, მისი თქმით, უკეთესი იქნება, მთავრობამ სიტუაციის განმუხტვა შეძლოს.
“უნდა მოვიწვიოთ ნეიტრალური მოსამართლეები, რომლებმაც უნდა გადაწყვიტონ სააკაშვილის ბედი. თუ ისინი იტყვიან, რომ სააკაშვილი უდანაშაულოა, მაშინ ხელისუფლებამ უნდა აღიაროს. ასევე უნდა იყოს საპირისპირო შედეგის დროსაც, თუ ნეიტრალური მოსამართლეები იტყვიან, რომ სააკაშვილი დამნაშავეა, ეს ოპოზიციამ უნდა აღიაროს.
მთავრობა ცდილობს, რაღაც ნაბიჯები გადადგას, მაგრამ სამწუხაროდ თუ საბედნიეროდ, რაღაც შეცდომებს უშვებს. წესით არ უნდა უშვებდეს, რადგან საქმე არის ძალიან მნიშვნელოვანი. მთავრობა უნდა იყოს ყურადღებით, რადგან საქმე ეხება ადამიანს , რომელიც ქვეყანას დიდი ხანი მართავდა და დღესაც ბევრ ადამიანს მის მიმართ სიმპათიები აქვს. ეს არ არის მარტო მიშას საქმე, ეს ქვეყნის საქმეა. მთელი საზოგადოება მართლაც ბეწვის ხიდზე გადის, საკმაოდ დაძაბული სიტუაციაა. უკეთესი იქნება, თუ მთავრობა შეძლებს სიტუაციის განმუხტვას” , – აცხადებს ტვ – “პირველთან” ექსკლუზიურ ინტერვიუში თორნიკე დავითაშვილი.